"Gol urganimizdan keyin raqib shtabi tomonidan haqoratli so'zlar yangradi" - Jamoliddin Rahmatullaev

M.FUTBOLL.TV

"Gol urganimizdan keyin raqib shtabi tomonidan haqoratli so'zlar yangradi" - Jamoliddin Rahmatullaev

08.06.2026 19:16 Ўқилди: 127

- Bu yilgi Proligada jamoangizdan nimalar kutilyapti va ichki muhit qanday? Jamoa oldiga qo'yilgan vazifalar haqida gapirsangiz…

- Jamoa oldiga qo'yilgan vazifa haqida ko'p bor takidlaganman. Tarkibimiz asosan 2007–2008 yillarda tug'ilgan yosh yigitlardan tashkil topgan. Asosiy maqsadimiz - terma jamoaga munosib, raqobatbardosh futbolchilarni etkazib berish va ularning sonini ko'paytirish. Odatda terma jamoaning asosiy o'yinchilari Superliga klublarida to'p tepishadi. Biz esa raqobatni yanada kuchaytirish uchun viloyat akademiyalaridan iqtidorli futbolchilarni ushbu Proliga jamoasiga jalb qilganmiz.

- O'tgan uchrashuvda Asilbek Aliev jamoaga qaytib, yaxshi ko'rsatkich qayd etdi. Umuman olganda, futbolchilarning bugungi imkoniyatlari qay darajada?

- Asilbekni hammamiz yaxshi bilamiz. U o'z mahoratini ko'rsata olgan futbolchi hisoblanadi. To'g'risi, U-17 jamoasi bilan Osiyo Kubogida ishtirok etgan paytimizda u bizga yetishmayotgan edi. Jamoaga qaytgach, maydonda juda yaxshi kayfiyatda o'yin tashkil qildi, golli vaziyatlarni realizaciya qilishda faol qatnashib, g'alabamizga hissa qo'shdi. U jamoamizning eng nozik nuqtasini to'ldira oldi deb ayta olaman.

- O'tgan turda "TerDU" jamoasiga qarshi kechgan uchrashuvda jamoangiz 4-golni urganidan so'ng maydonda janjalli vaziyat yuzaga keldi. O'sha mojaroga nima sabab bo'ldi?

- U yerda vaziyat juda tez sodir bo'ldi. E'tibor bergan bo'lsangiz, to'rtinchi golni kiritganimizdan so'ng raqib shtabi tomonidan bizning futbolchimizga nisbatan juda qo'pol va haqoratli so'zlar yangradi. Natijada biroz etirozli va tarang vaziyat yuzaga keldi. Men raqib jamoasi murabbiylaridan yosh futbolchilarni haqorat qilmasliklarini so'radim, shundan keyin bizga nisbatan ham biroz haqoratli so'zlar ishlatildi. Nima bo'lgan taqdirda ham, bu futbolda uchrab turadigan oddiy konfliktli vaziyatlardan biri.

Bekzod Suvonqulov suhbatlashdi