M.FUTBOLL.TV

"Lochin" bosh murabbiyi Eldor Moyliev: "G'alabaga ishtiyoq ko'pligidan shoshib harakat qildik"

11.04.2026 21:16   Ўқилди: 758

- O'yin haqida fikringiz?

- Avvalambor jamoamizni qo'llash uchun stadionga kelgan muxlislarga katta rahmat aytaman. O'yinga keladigan bo'lsak, biz tomondan shoshma-shosharlik ko'p bo'ldi. Gol urishga va g'alaba qozonishga ishtiyoq ko'pligidan ko'p vaziyatlarda shoshib harakat qildik. Balki bosimdan ham bo'lishi mumkin. Birinchi taymda qulay imkoniyatlarimiz bo'ldi, afsuski foydalana olmadik. Ikkinchi bo'lim boshidagi qizil kartochka jamoamizni qiyin ahvolga solib qo'ydi. Shunga qaramay yigitlarga rahmat, durang natijaga erishdik.

- Qizil kartochka ko'rsatilgan vaziyat borasida fikringiz?

- O'yindan keyin hujumchimiz bilan gaplashdim, raqibga umuman harakat qilmadim, o'zi kelib urildi dedi. Bilmadim, tirsagi tekkanmi yo boshqami, hakam "qizil" ko'rsatdi. Avvalgi tur "TerDU" bilan bahsda Shermatov Jahongirning qoshi yorildi, qon chiqdi, lekin hakam "sariq" ham bermagandi. Endi har bir hakamning o'z yondashuvi bor, biz bunga aralasha olmaymiz.

- 90+3-daqiqada ro'y bergan holat yuzasidan munosabatingiz?

- Futbolchimiz birga bir qochib ketgan vaziyatmi? To'g'risi, men ancha uzoqdan ko'rdim, hakam esa vaziyatga yaqin edi. Bu borada hakamlar ishiga aralashmaganimiz maqul.

- Jamoangizda tajribali futbolchilar bor. Bugungi o'yin uchun qo'yilgan aniq maqsad nima edi?

- "Lochin" jamoasi oldiga Superliga darajasidagi futbolchilarni tayyorlash vazifasi qo'yilgan. Tarkibimizda 1999 yil tug'ilganlar ham, 2005 yilda tug'ilganlar ham bor. Kimningdir fikrlashi zo'r, lekin jismoniy holati sabab U-21 jamoalariga o'ta olmagan. Universitet jamoasining tashkil etilishi futbolchilar uchun ikkinchi imkoniyat degan bo'lardim. Va albatta chiroyli o'yin ko'rsatib, ishqibozlarni xursand etish.

- Eldor aka, sizda "Sho'rtan"dan "Lochin"ga o'tish jarayoni qanday ro'y berdi?

- "Lochin" Proligada ishtirok etishi ma'lum bo'lgach, universitetimiz rektori Dilmurod Hamidullaevich taklifi bilan klubga keldim. (Ma'lumot uchun, "Lochin" klubi Qarshi davlat universiteti futbol jamoasi hisoblanadi - tahririyat). Menga ma'lum bo'lishicha, Dilmurod Hamidullaevich "Nasaf" bosh murabbiyi Ro'ziqul Berdiev bilan maslahatlashgan va Ro'ziqul Sadullaevich meni tavsiya qilgan. Men uchun "Lochin" taklifi qiziqarli bo'ldi. Ko'p shogirdlarim bilan "Nasaf farm"da birga ishlaganmiz. Jamoaga kelishimda Ro'ziqul Berdievning o'rni katta.

- "Lochin" klubi uchun qurilayotgan stadion haqida ma'lumot berib o'tsangiz?

- Juda chiroyli va ko'rkam stadion barpo etilmoqda. Maysa ekildi, hozirgi kunda parvarish jarayoni ketyapti. Ikkinchi davraga maydon tayyor bo'ladi deyishyapti. Tribunalar va boshqasi tayyor.

- Sizningcha, Proligada Superliga uchun kurashadigan uchta jamoa qaysi?

- "Sho'rtan", "Metallurg", "Kattaqo'rg'on" va "Aral" oldiga Superligaga chiqish vazifasi qo'yilgan. Lekin chempionat hech kim uchun oson kechmaydi. O'zingiz ko'ryapsiz, oson o'yinlar bo'lmayapti, hamma kurash olib bormoqda.

- Tashkiliy ishlar va boshqa masalalar bo'yicha klubda muammo yo'qmi?

- "Lochin"da hech qanaqa muammo yo'q. Buning uchun klub rahbariyatiga minnatdorchilik bildiraman. Mashg'ulot o'tkazish uchun maydon, ovqatlanish, baza - xullas hammasi joyida.

Futbol yangiliklari || Futbol habarlari || Футбол янгиликлари || Футбол хабарлари

Дўстларга юборинг: 

Бош сахифага қайтиш