M.FUTBOLL.TV

O'FA Fabio Kannavaroning iste'fosi haqidagi xabarlarga munosabat bildirdi

03.11.2026 20:56 Ўқилди: 383

Avvalroq taniqli insayder Fabricio Romano Osiyo kubogi-2027 musobaqasining o'tkazilish muddati o'zgartirilganidan so'ng italiyalik mutaxassis O'zbekiston milliy terma jamoasi bosh murabbiyligidan ketish imkoniyatini ko'rib chiqayotgani haqida xabar bergan edi.

Mazkur ma'lumotlar ortidan O'zbekiston futbol assotsiatsiyasi rasmiy bayonot bilan chiqdi.

"So'nggi soatlarda ayrim xorijiy manbalarda O'zbekiston milliy terma jamoasi bosh murabbiyi Fabio Kannavaro Osiyo kubogi-2027 musobaqasi muddatining o'zgartirilishi ortidan o'z lavozimini tark etishi mumkinligi haqida xabarlar tarqalmoqda.
O'zbekiston futbol assotsiatsiyasi mazkur xabarlar haqiqatga to'g'ri kelmasligini ma'lum qiladi.
Ommaviy axborot vositalari va futbol muxlislaridan tasdiqlanmagan ma'lumotlarga ishonmaslikni hamda rasmiy xabarlarga tayanishni so'raymiz", – deyiladi O'FA bayonotida.

Eslatib o'tamiz, Osiyo futbol konfederatsiyasi 3 noyabr kuni Saudiya Arabistonida bo'lib o'tadigan Osiyo kubogi muddati o'zgartirilganini rasman ma'lum qildi.

Yangi taqvimga ko'ra, musobaqa 2027 yil 23 dekabrdan 2028 yil 21 yanvarga qadar o'tkazilishi rejalashtirilgan.