Superliga-2025. O'tgan mavsumning eng yosh va eng yoshi katta futbolchisi kimlar bo'ldi?

M.FUTBOLL.TV

Superliga-2025. O'tgan mavsumning eng yosh va eng yoshi katta futbolchisi kimlar bo'ldi?

03.12.2025 09:56 Ўқилди: 557

2025 yilgi mavsum Superligada eng yosh futbolchisi "Bunyodkor"ning 2009 yilda tug'ilgan yarim himoyachisi Mirkomil Murodov bo'ldi. U 15 yosh, 11 oy, 26 kunligida "Xorazm"ga qarshi o'yinda maydonga tushdi. Keyingi o'rindan "Buxoro" yarim himoyachisi Ozodbek Rajabov joy oldi. To'ptepar 16 yosh, 7 oy, 27 kunligida oxirgi turda "Surxon"ga qarshi o'yinda harakat qildi. Ro'yxatda Ayubxon Muxtorov ("Qo'qon-1912", 17 yosh, 6 oy, 15 kun), Behruz Karimov ("Surxon", 17 yosh, 7 oy, 1 kun), Kamronbek Yusupov ("Surxon", 18 yosh, 1 oy, 8 kun) kabi futbolchilar ham borligini aytib o'tish mumkin.

Eng yoshi katta futbolchi "Xorazm" darvozaboni Sardor Qobuljonov qayd etildi. Tajribali kiper 38 yosh, 9 oy, 19 kunligida elitada o'ynadi. Qobuljonov o'tgan mavsumda 11 ta o'yinda darvozasidan 16 ta gol o'tkazdi va 3 ta bahsda darvozasi dahlsizligini saqlab qoldi. Ikkinchi pog'onada Bahodir Nasimov o'rin egalladi. Hujumchi 38 yosh, 4 oy, 27 kunligida Superligada maydonga tushdi. Uchinchi o'rinni "Nasaf" legioneri Dragan Cheran o'ziniki qildi. Futbolchi 38 yosh 1 oy, 23 kunlikda Superligada oxirgi turda maydonga tushdi. Cheran shu yoshda bo'lishiga qaramay Superligada 30 ta o'yinda 8 ta gol, 4ta assist amalga oshirdi. Bundan tashqari Stanislav Andreev ("So'g'diyona" 37 yosh, 6 oy, 24 kun), Marko Stanoevich ("Dinamo", 37 yosh, 6 oy, 24 kun), Mirzohid G'ofurov ("Navbahor", 37 yosh, 3 oy, 7 kun) kabi nomlar ham bor.