M.FUTBOLL.TV

Гуруҳ босқичида "Шабаб Ал Аҳли", "Ал Ҳилол", АГМК жамоалари қаршилигини енгиб кейинги босқичга йўл олган душанбеликлар плей-оффда "Персеполис" билан тўқнаш келди. 

Душанбедаги марказий стадионда мухлислар қаршисида тенгма-тенг курашлар остида ўтган ўйинда форс клуби кичик 1:0 ҳисобида ғалабани тантана қилиди. Ушбу учрашувдан сўнг жамоанинг украиналик бош мураббийи Виталий Левченко билан кичик интервью ташкил қилдик. 

- Ажойиб атмосфера остида ўтган "Персеполис" билан ўйин ҳақида...

- Ҳақиқатдан ҳам яхши даражадаги ўйин кўрсатдик. Стадионда ажойиб муҳит ҳукмрон бўлди. Ўйинга келсак, биз ўз вазиятларимиздан фойдалана олганимиз йўқ. Яна қаердадир рақиб дарвозабони ўзини кўрсата олди. Айрим паллада маҳорат етишмаслиги панд берди. Аламлиси қўшимча дақиқаларда кераксиз голни ўтказиб юбордик

- Гуруҳ босқичида сенсациялар қайд этган "Истиқлол" "Персеполис"га ҳам ҳақиқий бош оғриқ бўла олди. Нима, деб ўйлайсиз тожик футболининг яширин имкониятлари юзага чиқяптими? 

- Айтганингиздек гуруҳимиз энг кучлиси эди. ОЧЛда илк бор иштирок этаётганимизга қарамасдан гуруҳдан чиқишни уддасидан чиқа олдик. Ушбу натижалар ортида бутун жамоанинг катта меҳнати ётибди. Ҳар бир учрашувда кучли иштиёқ ва хоҳиш билан тўп тепганлари учун йигитларга раҳмат айтаман. Мусобақа бизга олдинга янада кўпроқ интилишимизга ёрдам берди. Тўғри "Персеполис" билан ўйин натижасидан хафамиз. Лекин биз тўғри йўлда эканлигимизга аминман. Олдинга силжиш учун энди бизга нималар зарурлигини биламиз. 

- Ушбу учрашувда "Истиқлол" футболчиларининг жисмоний ҳолати, босимга чидамлилик даражаси яхши эканлигига гувоҳ бўлдик. Тошкентдаги йиғин давомида бу борада хавотирлар юзага келганди. Хўш, бундай масъулиятли баҳсга футболчиларни қандай тайёрладингиз?

- Жисмоний ҳолатимизга келсак, тўғри таъкидладингиз биз ўйинга жуда яхши ҳозирлик кўрдик. Хўжандда йиғин ташкиллаштирдик. Катта жисмоний кучга эга ўзбек клублари билан назорат ўйинларини ўткадик. Шу боис бизга жисмонан толиқиб қолганимиз сезилди. Лекин менга бунинг аҳамияти йўқ эди. ОЧЛга тайёргарлик кўраётганимиз учун натижа устувор ҳисобланмасди. 

- Эртага Қаршининг "Насаф" жамоаси ОФК кубоги Интер Зонал ярим финал босқичида Ҳиндистоннинг "Моҳун Баган" клуби билан ўйнайди. Вакилларимизнинг мусобақада ғолиб чиқиш имкониятларини қандай баҳолайсиз?

- "Насаф" шахсан мен учун ОФК кубогида ғолиб чиқиш учун асосий фаворитлардан бири ҳисобланади. Сизларга мухлислик қиламиз ва омад тилаймиз.

Абдулазиз Искандаров суҳбатлашди