M.FUTBOLL.TV

Бутун дунё кутаётган ажойиб ўйинни ким шарҳлаши маълум

14.05.2020 04:42 Ўқилди: 1320

Коронавирус пандемияси туфайли тўхтаб қолган спорт ўйинлари қатори катта футбол ҳам узоқ танаффусдан кейин қайтиш арафасида.

Европа топ лигалари ичида биринчилардан бўлиб "камбэк"ни амалга ошираётган Бундеслига 16 май куни катта экранга қайтади. Бундеслиганинг рестарти ажойиб тўқнашув, яъни "Рур дербиси" мақомидаги "Боруссия" Дортмунд ва "Шальке" ўртасидаги баҳс орқали давом эттирилади.

Сайтимизга маълум бўлишича, мазкур марказий ўйинни Россиянинг "Матч ТВ" каналида Германия футболи билимдони, ажойиб шарҳловчи Сергей Кривохарченко шарҳлайди.

Яқинда Шаҳбоз Беғамов Бундеслига рестарти ҳақидаги постида Германия чемпионатини қайси каналда кўриш ҳақидаги постида айнан "Матч ТВ"ни тавсия қилган ва хусусан Сергей Кривохарченко шарҳида Бундеслигани томоша қилишни маслаҳат берганди.

Маълумот ўрнида, Жаҳон футболидаги энг принципиал ва қизиқарли дербилардан бири бўлган "Рур дербиси" доирасида "Боруссия" ҳамда "Шальке" жамоалари барча мусобақаларда жами 59 маротаба дуч келишган. Ўзаро ўйинлардаги устунлик "Шальке"га тегишли - 20 ғалаба. "Боруссия" Дортмунд эса 15 бор рақибини мағлуб этган. Қолган 24 учрашувда кучлар тенг келган.

Биринчи даврадаги Гельзенкирхенда ўтган баҳсда томонлар муроса кўчасини танлашганди. Айни дамда турнир жадвалида Давид Вагнер бошқарувидаги "Шальке" 37 очко билан 6-ўринни эгаллаб турибди. Льюсен Фавр бошчилигидаги "Боруссия" Дортмунд эса 51 очко билан пешқадам "Бавария"дан 4 очкога ортда ва иккинчи поғонани банд этган.

Эслатиб ўтамиз, "Рур дербиси" 16 май куни Тошкент вақти билан 18:30да старт олади. Бундеслига шу куни 2 ойлик танаффусдан кейин яна ишга киришади.