M.FUTBOLL.TV

Бразилия терма жамоаси таркибида икки карра жаҳон чемпиони бўлган Роналдо Бразилия футбол конфедерацияси президенти лавозими учун курашмасликка қарор қилганини айтди.

"Кейинги сайловларда Бразилия футбол конфедерацияси президенти лавозимига номзодимни қўйиш ниятим ҳақида жамоатчиликка эълон қилганимдан сўнг, расман бу қароримдан воз кечаётганимни маълум қиламан. Агар қарор қабул қилиш ҳуқуқига эга бўлган аксарият инсонлар Бразилия футболи ишончли қўлларда деб ҳисоблашса, менинг фикрим аҳамиятсиз.

Агар сайланганимда, биринчи қадамларим клубларга овоз бериш ҳуқуқини бериш ва штатларда футболни ривожлантириш учун маҳаллий федерациялар фикрига кўпроқ эътибор қаратиш бўларди. 27 та федерация билан дастлабки мулоқотимда 23 та ёпиқ эшикка дуч келдим. Федерациялар мен билан учрашишдан бош тортди ва улар амалдаги маъмуриятдан мамнун эканликларини билдирди. Мен ўз лойиҳамни тақдим этиш, ғояларим билан ўртоқлашиш ва уларни ўзим истаган тарзда тушунтириш имкониятига эга бўлмадим. Кўпчилик раҳбарлар амалдаги президентни қўллаб-қувватламоқда, бу – уларнинг ҳуқуқи ва мен уни ҳурмат қиламан. Мен ташаббусимга қизиқиш билдирганларнинг барчасига миннатдорчилик билдираман ва Бразилия футболини ривожлантириш йўли мулоқот, шаффофлик ва бирдамликдан иборат, деб ишонишда давом этаман", — деб ёзган Роналду ўз ижтимоий тармоқ саҳифасида.

Бразилия терма жамоасининг собиқ футболчиси Роналдо фаолияти давомида «Крузейро», ПСВ, «Барселона», «Интер», «Реал», «Милан» ва «Коринтианс» жамоаларида тўп сурган. У 2011 йилда профессионал футболчилик фаолиятини якунлаган. Жами карьераси давомида бразилиялик ҳужумчи 735 та ўйинда майдонга тушиб, 512 та гол урган.