M.FUTBOLL.TV

Асрор Алиқулов: "Футбол – бу маданият. Рақиб дарвозабони ўзини бошқачароқ тутиши керак эди"

04.04.2024 00:50 Ўқилди: 618

Про лига тўртинчи туридан ўрин олган "Машъал" ва "Шўртан" (2:0) ўртасидаги дербидан сўнг мезбонлар бош мураббийи Асрор Алиқулов матбуот анжуманида қатнашди.

Ўйин ҳақида

- Дерби ҳар доим оғир, курашларга бой бўлади. Кутганимиздек ҳам бўлди. Футболчилар ҳиссиётларини жиловлай олмай қолган вазиятларни гувоҳи бўлдик. Ўйлайманки, ҳақли ғалаба қайд этдик. Ўйин томонлама "Шўртан"нинг ҳужумларига тайёргарлик кўргандик. Режаларимиз ўз самарасини берди. Мухлисларни ғалаба билан табриклайман.

- "Шўртан" учун "Машъал" ноқулай рақибми ёки Асрор Алиқуловми?

- Рақиб танланмайди. Ҳар бир ўйинга тайёргарлик кўрамиз. Барибир, асосий ишни футболчилар қилишди. Баъзи футболчиларимиз аввал "Шўртан" сафида ҳам ҳаракат қилишган, бу ҳам ўз навбатида бизга ёрдам берди. Футболчиларим бугунги дербига ўзларидаги 100% кучдан ҳам кўпроғини сарфлашди. Бу фақат мураббийни ғалабаси эмас.

- Учрашув сўнггида асабий ҳолатда майдонни тарк этдингиз. Бунга сабаб нима бўлди?

- Дарвозабон бизни футболчига очиқдан очиқ зарба берди. Футбол – бу маданият. Қонун-қоидалар мавжуд. Мухлислар кузатишмоқда, интернет орқали қанчадан қанча инсон кузатмоқда. Фикримча, дарвозабон ўзини бошқачароқ тутиши керак эди. Ўша зарба мени асабийлашишимга сабаб бўлди.

- "Машъал" кейинги баҳсни Бухорода ўтказади. "Бухоро" ва "Машъал"да очколар тенг. "Бухоро"га қарши ўйин қандай кечади деб ўйлайсиз?

- "Бухоро" таркибида тажрибали ўйинчилар бор. "Бухоро"га қарши ўйин қандай бўлиши ҳақида ҳали режа тузамиз. Бу ўйинда биз курашамиз ва ўзимизга керакли натижага эришишга ҳаракат қиламиз.

- Бу йил жамоада қандай ёшлар порлаб чиқади деб ўйлайсиз?

- Таркибимизда яхши ўйинчилар кўп. Ёшлар билан ишлаш ва шу билан бирга яхши натижа кўрсатиш бироз қийин бўлади, аммо "Машъал"нинг аввалги мавқеидан келиб чиқиб, буни уддалашга ҳаракат қиламиз. Ҳозир аниқ фамилияларни айта олмайман. Мавсум якунида барчаси аниқ бўлади.

- Асрор ака, сиз "Шўртан" мураббийи сифатида "Машъал"ни, "Машъал" мураббийи сифатида "Шўртан"ни мағлуб қилгансиз. Бу нарса бир неча марта такрорланган. Бунинг сири нимада?

- Бу фақат мени ишим деб айтмаган бўлардим. Энг муҳими футболчиларнинг майдондаги ижросидир. Мураббийлар штабимиз томонидан бугунги қўлланилган тактика ғалабага сабаб бўлди. Бу нарса айнан менга боғлиқ дея олмайман.