M.FUTBOLL.TV

Хабарингиз бор, Ўзбекистон футбол ассоциацияси мамлакатимизда футболни ривожлантириш учун хорижий мамлакатлар футбол федерациялари, клублар ва академиялар билан яқин ҳамкорликни ўрнатиб иш олиб боришга асосий эътиборни қаратмоқда.

Жумладан, Ўзбекистон футбол ассоциацияси мутасаддилари Санъат Шарипов ва Шарофиддин Ҳожиниёзов Португалиянинг "Спортинг" клубига ташриф буюриб, бу клуб билан ҳамкорлик масалалари бўйича келишиб олишди.

Жумладан, "Спортинг" клуби академияси директори Пауло Гомес ва клубнинг Спорт лойиҳаларини амалга ошириш бўйича масъули Диего Гома билан учрашув чоғида ЎФА мутасаддилари болалар футболини ривожлантириш ва мураббийлар малакасини ошириш мавзусида суҳбатлашишди. Шунингдек, ёзда мамлакатимизда "Спортинг" клуби футбол оромгоҳи ташкил этиши бўйича ҳам маслаҳатлашиб олинди.

"Спортинг" клуби академияси дунёга машҳур академия бўлиб, ўз вақтида бу ерда Луиш Фигу, Криштиану Роналду каби жаҳон юлдузлари, "Олтин тўп" соҳиблари таҳсил олишган. 2016 йил Европа чемпионлигига эришган Португалия терма жамоаси таркибидаги 23 нафар футболчининг 10 нафари "Спортинг" академияси тарбияланувчиси ҳисобланади.

"Биз футболчилардан ўзининг ёшига мос стандартлар асосида меҳнат қилишни, машғулотлар олиб боришни талаб қиламиз. Биз 14-15 ёшли футболчидан ақлбовар қилмас ўйин кўрсатишни сўрамаймиз. Бу ёшда у ўз салоҳиятини тўлиқ намойиш қила олмайди. Аммо бизнинг талаблар асосида меҳнат қилса, 20 ёшга бориб биз "тайёр маҳсулот" - топ-клублар эътиборини қозона оладиган футболчига эга бўламиз. Академиямиз тарбияланувчиси Криштиану Роналду бунга ёрқин мисол",- дейди клуб директори Пауло Гомес.

Диего Гома эса 7 йил давомида Қатарнинг машҳур "Aspire" академиясида фаолият олиб бориб, футболчиларни тайёрлаш, уларнинг иқтидорини юзага чиқариш бўйича катта ҳажмдаги меҳнатни амалга оширди. Қатар миллий терма жамоасининг яқинда БААда ўтган Осиё Кубогидаги муваффақиятида мазкур инсоннинг ҳам ҳиссаси катта деб айтиш мумкин.     

Музокаралар давомида Диего Гома ёзда мамлакатимизга ташриф буюриб, "Спортинг" клуби томонидан ташкил қилинадиган футбол оромгоҳида иштирок этиши бўйича келишиб олинди.